يا فرح كن في قلبي أبلغ


{ أحيانَا تكون السعادة أبلغ من أن توصفها كلمات أو حروف }

بمجرد النظر إلى أحداث / إنجازات / تفاصيل هذا الأسبوع فإني أجده أسبوعًا مزدحمًا بالكثير الكثير –ما شاء الله– من رؤية من أحب ، تطورات في حياتي ، طرق تفكير جديدة ، تأملات في الحياة كنت غافلة عنها و الأهم إنه كان أسبوع اختبارات مرهق جدًا ، و لأنكم غاليين على قلبي .. حابه أشارككم أهم حدث حصل لي خلال هذا الأسبوع ، و الود ودي أحكيكم عن الأسبوع بأكمله لكن المكان يضيق هنا ..
و على لسان الأمس :

سعادة تملكت قلبي و مازالت تتملكه حتى بات يشعر بالتعب حقًا ، كيف لا و اليوم أول يوم لي في مكتب الدعاية و الإعلان ، منذ أن سمعت بوجود مكتب مثله في الجامعة تحمّست كثيرًا ، و من حسن حظي تلقيت اليوم “مسج” يطلب مني التوجه إليهم للضرورة ، ذهبت و كلي انشكاح و … كل أنواع الأحاسيس و المشاعر ، بحثت عن صاحب المسج “أ.أمل” و التي رحبت بي بـِ طريقة جعلتني أحمر خجلاً بهرتني بكرمها … لحظة ستوووووب حاسة أسلوبي زي وجهي وودي أقلب عاااامي و أعتذر عن أي أخطاء إملائية مُقدمًا !

نرجع نكمل الموضوع .. حبيبتي تخيلوا أول ما شافتني صافحتني بقوة و صارت تقول لي : “مدحوكِ ليّ” .. “سمعت عنك أشياء حلوة” .. “أتوقع لكِ مستقبل باهر” ، و الصراحة أنا كلي علامات استفهام هو مين اللي قال و اش قال ؟؟ لكن باين إنو ما قال إلاّ خير عشان كده ما في مشاكل و الله يسعده و ين ما كان ..
المهم عرّفتني على اللي معاها في المكتب و جلّستني و صارت تشرح لي آلية العمل و اش الشغل اللي راح نشتغل عليه ، و أنا في قمة سعادتي فجأة حسيت إني Business woman و لا أحد يسألني ليه ؟! مرة حبيت الإحساس اللي كنت حاسة فيه … و شوية قالت لي تعالي أجلسي جنبي ، قلت في نفسي “على طول كده ! ما في مشاكل” .. و صارت تورّيني اش أعمل بالضبط ، طبعًا احم احم أختكم في الله المصممة الفتاكة طول عمرها تبدأ تصمم أعمالها من الصفر يعني من الشاشة البيضاء في الفوتو ، لكن دي المرة كان عليّ كتابة الكلام و تنسيقه ، بس أكيد أبدًا مو بطّال الموضوع كـ بداية و أكيد في المستقبل راح يتطور دوري ..

شوية قالت لي أقعدي على مكتبي و أبدئي أشتغلي ، معليش ثواني خلوني هنا أوصف أحاسيسي و أنا قاعدة على مكتبها ، و الله من جد كنت مبسوطة مو عشان شيء بس حسيت إني سعيدة و الجو كله يساعد ، حبيت إضاءة الغرفة ، تحسي الشمس وسطها و ناس حوليكِ على مكاتبهم … بمعنى آخر عشت في عالم مختلف لمدة ساعة كاملة و طول ما أنا قاعدة أشتغل الله يسعدها “أ.أمل” ..
دلال .. جيعانه” .. “دلال فطرتي
دلال قهوة .. شكولاته .. شاي” .. “دلال لا تستحي
و الله حبيتها هـ الإنسانة ، و في الأخير لمن لاحظت إني على كل شيء أقول “لا .. شكرًا” مو شيء بس ماني من النوع اللي آخذ عَ الجو من أول مرة ، أعطيني “سنكرز” من غير ما تسألني حتى ، و كل ما تسلّم / تشوف أحد تعرفهم بيّ و تقول “هذه بنتي” يا ناس .. تعرفوا أسعد إحساس في الحياة لمن تحسي في أحد مهتم فيكِ ، يقدركِ لـِ شخصكِ و إن كان ما يعرفكِ ذاك الزود –بدا الهرج البدوي– من جد يمكن هذا أكثر ما أفتقده من أيام المدرسة ، ما أدري ليش اكتشفت اكتشاف إني أحب أحد يناديني باسمي !! من جد مررررررررره حلو الإحساس ، فجأة صرت أحس اسمي حلو هو حلو من أول بس قصدي صار أحلى دحين .. ما أعرف شكلي بدأت أسطّل ..

المهم خلصت شغلي و خرجت و أنا أطير / أحلق ما أعرف اش أوصف أسالوا إسراء و رزان بس كيف كنت أمشي .. حبيت المكان بكل من فيه ، صح كمان شفت “بيان” ! هذه هي البنت اللي عرفتني على المكتب و كان تواصلنا بس بالنت و فجأة شفتها حسيت يا ناس من جد أنا في عالم ثاني .. صدقوني مو في الجامعة أبدًا !!!!

عارفين فجأة جاء في بالي لو “أ.أمل” بطريقة ما !! تدخل على الموضوع تقول اشدي الإنسانة ؟! بس أنا مُصرّة أعبر عن أحاسيسي العجيبة .. من جد شكرًا كبيرة () بحجم عطائكِ و ابتسامتكِ “أ.أمل” و على الانطباع السعيد اللي أعطيتيني هو ، ربي –إن شاء الله– يقدّرني و أخدم المكتب بكل ما عندي و أترك أثر في قلوبكم ..

سوري على الوصف اللي مش و لابد و لا تحسبوا إنو أحاسيسي هذه ناتجة عن غرور أو شيء من هذا القبيل أبدًا .. بالعكس الموضوع مو كده أبدًا الموضوع إني حسيت بالمسؤولية و إني راح أتحمل عمل شيء مرتب دي المرة مو على كيف كيفي ، راح يكون هـ العمل “التزام” بكل معنى الكلمة ، بالإضافة إلى أن هذه التجربة بالتأكيد ستضيف لي الكثير الكثير في كل جوانبي شخصيتي و أعمالي ..

{ دائمًا هناك أمور مكانها القلب فقط }

Advertisements

12 تعليق to “يا فرح كن في قلبي أبلغ”

  1. مها نور إلهي Says:

    ابنتي العزيزة
    هنيئا لك العمل و الأهم هنيئا لكِ الشعور بتحقيق ذاتك فهذا هو أرقى و أجمل شعور يحس به الإنسان…
    اتمنى لك التوفيق 🙂

  2. تونا جاوية بالنكهة اليابانية Says:

    يسعدك ربي يا أحلى دلال 🙂
    أهم شي أنك مبسوطة وصراحة حابة اتعرف على الاستاذة الظريفة دي مو عشان شي إلا بس عشان تضيفني بقهوة وشوكولاته :mrgreen:

    مررررره حبيتها من وصفك ينااسوووو عليها ويناااسوووو عليكي
    مع اني مني فاهمة الهرجة واعلانات ايش بالزبط وفين يعني بأشوفها في ارجاء الجامعة السعيدة ؟ 🙂

    دمتي بخير وسعيدة لسعادتك

    • shiawase Says:

      أهلاً بـ تونا اللزيزة ..
      فكرة المكتب إنو أي لجنة حابة تعمل حدث / event / محاضرة …الخ يرسلوا لهم إنو نبغى إعلان ..
      و المكتب يتكفل بعمل الاعلانات و طباعتها و توزيعها على أرجاء جامعتنا العريقة 😛

  3. beachi ✿ Says:

    وأخيراً لقيت موضوع صغير يناسبني 😛 <<والله مدري ليش أحس إنه مواضيعك أكبر مني وأعجز عن التعليق فيها..
    بس الحمد لله قدرت أرد هالمره 🙂

    وطالما إنها أول ماأسطره في هذه المدونه المصونه, خليني أبدأ برسميه =")
    فـ أهلاً دلال, <<أحترت!! أحب دايماً أنادي الناس بأحب الأسماء لهم, ,كان على بالي دلول, لكن طالما الأحب دلال, فإنتِ دلاااااال الحلوه 😳

    خليني أرجع للموضوع الأساس!!

    تعرفوا أسعد إحساس في الحياة لمن تحسي في أحد مهتم فيكِ ، يقدركِ لـِ شخصكِ و إن كان ما يعرفكِ ذاك الزود

    هذه العبارة أصابت الهدف بعينه, لأني حسيت بإحساس مشابه في [أول] زياره لي لمدرستـ37ــي الحبيبه بعد التخرج <<يناااااسو عليهم والله كنت ماني داريه عن روحي, مبسوطه, مبهوره, لا لا, كنت مخدره من قوة وقع السعاده عليَّا,
    من كل إتجاه وصوب, إسراء تبغي عصير, تبغي قهوة, عاجبك الفطور, نفضيلك الغرفه دي عشان تذاكري… و و و …إلخ
    ^
    ^
    دحين تقولي الأخت خرجت من موضوعي وفتحتلي موضوع جديد <<معليش تراني أعشق الإستطرادات 😛

    نرجع للموضوع للمرة الثانيه:

    حسيت بالمسؤولية و إني راح أتحمل عمل شيء مرتب دي المرة مو على كيف كيفي ، راح يكون هـ العمل “التزام” بكل معنى الكلمة ، بالإضافة إلى أن هذه التجربة بالتأكيد ستضيف لي الكثير الكثير في كل جوانبي شخصيتي و أعمالي ..

    بالنسبة للمسؤوليه:
    فأنا وحتى الآن, بإمكاني أشهد إنك على قدر كافي من المسؤوليه والترتيب <<يعني لا تخافي تراك مرتبه رباني حتى في أعمالك _ماشاء الله_
    أما الإلتزام:
    فطالما شيء حبته نفسك وعشقته روحك, فراك تلتزمي به وبإبداع <<إسأل مجرب ولا تسأل طبيب..
    وأخيراً, بالنسبة للإضافات في ذاتك:
    فأسأل الله إنه يبارك لك فيها دااااايم الدوم يارب..
    .
    .
    .
    طبعاً بعد كل هذا الكلام,,
    مـــــــا رااااااح أزيـــــــد ولا حرف زيادة حتى لو كان عندي..
    يكفي وزاد عن اللزوم..
    بس ياللا,, مين يدري!
    يمكن أقعد أستنى من جديد _لمدة دهر_ "إلين ألقى موضوع صغير أقدر أستوعبه" وأحس إني قادره على الرد عليه ..
    يعني هذا الرد يعوض تقصيري 😛 <<ألا هل بلّغت اللهم فاشهد..

    دمتي بود يا,, دلال الحلوه =")

  4. ❀Rose Says:

    عارفة كنت أقول الله يعين دلال على دا الأسبوع كل الأختبارات فيه وقبل الإجازة كمان >< أنوااع الإحباط ..
    بس سبحان الله كيف كان أهم وأحلى أسبوع بالنسبة لك ^^
    أهم شي تعطينا حلوان أول راتب << فاهمة الهرجة غلط :mrgreen:

  5. kelo 3sl Says:

    يختي عليكي وانتي مبسوطه 😉 ,,
    ان شاء الله دوم ياستي عشت احساسك وفرحت بجد من خلال تدوينتك حسيت بشعورك
    وحبيت أ امل ..

    يالله تتهني ياعسل 🙂

  6. LOOOm Says:

    آأإأآأإأآتمنى جلوسك على هذا المكتب يكون اول خطوة الى طريق النجاح والتميز ..

    ولو سمحت اذا مرة طاحت الميااانة بينك وبين الاستاذة امل صوري المكتب الخقاقي لاني اتحمست اشوفو من الوصف ^^

    • shiawase Says:

      يا رب يسمع منكِ ربي ..
      هههه ، أمّا فجأة أقول لهم يا حلوين أبغى أصور المكتب -نظرًا لأن مكتب الاعلانات مليان مكاتب- ، عز الله ينادوا لي الشؤون و يشيلوني إلى ما أعرف فين @-@
      بس إن شاء الله يجي يوم و أصوره 😛

  7. Kaki-chan Says:

    ماشالله من حقج انج تستانسين
    آدام الله لك السعادة ( ^ ^ )/□

يسعدني ردك :)

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s


%d مدونون معجبون بهذه: